ප්‍රධාන පෙළේ රෝහලක *විශේෂඥ වෛද්‍යවරයෙක්* ගේ ලිපියක්

 *ගරු සෞඛ්‍ය අමාත්‍යතුමා සහ සෞඛ්‍ය අමාත්‍යාංශයේ සියලුම නිලධාරීන් වෙත,*

*මහත්මයාණනි / මහත්මියනි,*

කලකට පසු ඔබ සෑම දෙනා අමතා ලිපියක් එවීමට නොහැකි වීම ගැන මම මහත් කනගාටුවට පත් වෙමි. එහෙත්, වර්තමාන සෞඛ්‍ය සේවාව පත්වී ඇති ඛේදජනක තත්ත්වය ගැන වචනයක් හෝ නොලිව්වොත් මම මගේ යුතුකම ඉටු නොකළා යැයි මා හට හැඟෙන නිසා, මෙම ලිපිය ලිවීමට අදහස් කළෙමි.

මහත්වරුනි, මම ඔබතුමන්ලා යටතේ පාලනය වන්නාවූ ප්‍රධාන පෙළේ රෝහලක *විශේෂඥ වෛද්‍යවරයෙක්* වෙමි. නිදහස් අධ්‍යාපනය මඟින්, තරගකාරී විභාගයකින් වෛද්‍ය විද්‍යාලයට තේරී වසර ගණනාවක් එහි කාලය ගතකොට, එහිදීද ඉතා උසස් අයුරින් සමත්වී, වෛද්‍ය පශ්චාත් උපාධියක්ද ලබා, විදේශ ගත පුහුණුවක්ද ලබා, විශේෂඥ වෛද්‍යවරයෙකු ලෙස වසර *දහඅටක* කාලයක පටන් සෞඛ්‍ය අමාත්‍යාංශය යටතේ දිවයිනේ ප්‍රධානතම රෝහලක සේවය කරමි. එම පුහුණුවට සහ මගේ හැකියාවට අනුව ඉතා ඉහළ වැටුපකට විදේශ ගත රෝහලක හෝ විශ්ව විද්‍යාලයක හොඳ රැකියාවක් කළ හැකි වුවද, ප්‍රවේණිගතව පවතින දැඩි *දේශප්‍රේමය* නිසා, මෙරටට පැමිණ දහසකුත් එකක් අපහාස මැද දැනට දශක දෙකකට ආසන්න කාලයක් මෙහිම සේවය කරමි.

එහිදී මාගේ රාජකාරිය අනෙකුත් සියලුම වෛද්‍යවරුන් මෙන්ම ඉතා *අවංකව* මෙන්ම *කාර්යක්ෂම* අන්දමින් ඉටු කර ඇති අතර හැකි සෑම විටකදීම සෞඛ්‍ය සේවය දියුණු කිරීමට හැකි පමණ ක්‍රියාත්මක වී ඇත. විශේෂයෙන්ම, ඉතා දරුණු බැක්ටීරියා ආසාදන සඳහා අවශ්‍ය උපදෙස් රට වටේ ඕනෑම වෛද්‍යවරයෙකු හට ලබා දී රෝගීන් සුවපත් කිරීමට දායක වී ඇත්තෙමි. එමෙන්ම, මා සතු දැනුම නොවලහා සෑම විටකදීම ලබා දී ඇත්තෙමි.

සැමවිටම මගේ රාජකාරිය අකුරටම සිදු කර ඇති අතර මම තවදුරටත් එය සිදු කිරීමට නොපැකිලව ශපථ කරමි. එහෙත්, මම දැන් වියපත් වී ඇත්තෙමි. ඉස්සර මෙන් දුව පැන සේවය කිරීමට නොහැකි වුවද, තව වසර හත අටක් හොඳින් සේවය කළ හැකියි. ඒ සඳහා කිසිදු අමතර පහසුකමක් ඉල්ලීමට බලාපොරොත්තු නොවන අතර, මම එක ඉල්ලීමක් ඔබ සැමගෙන් ඉල්ලා සිටීමට බලාපොරොත්තු වෙමි.

මාගේ රාජකාරී ස්වරූපය අනුව දැඩි සත්කාර ඒකක තුළ ඉතා දරුණු ආසාදනවලින් පෙළෙන, මියැදෙන සිය ගණන් රෝගීන් දැක ඇත. බොහොමයක් රෝගීන් එදිනෙදා ජීවත් වීමට පවා මුදලක් නැති අයයි. රජයේ රෝහල්වලින් ලැබෙන සේවාවන් සහ නොමිලේ ලැබෙන ඖෂධ නොමැති වුවහොත් අනිවාර්යයෙන් ඔවුන් මිය යනු ඇත. විශේෂයෙන්ම, මේ කාලයේ රෝහල් තුළ *ප්‍රතිජීවක ඖෂධ හිඟ* බැවින් ඔවුන්ගේ ජීවිතවලට මහත් වූ තර්ජන ඇති වී ඇත. එහිදී, ඇතැම් ප්‍රතිජීවක ඖෂධ නොලැබී යාම නිසා ඔවුන්ගේ ජීවිතවලට හානි වීම වැළැක්වීමට අනිවාර්යයෙන් ඖෂධ මිලදී ගැනීම සඳහා පිටතින් බෙහෙත් ලබා ගැනීම පිණිස *තුඬු (වට්ටෝරු)* ලබා දීමට සිදුවේ. ඒ අදාළ ඖෂධ රෝහල් තුළ නොමැති වූ විට පිටතින් ලබා ගැනීම හැර වෙන කිසිම විකල්පයක් නොමැති නිසාය. මා හට අධිකරණයෙන් හානියක් සිදුවිය හැකි වුවද, රෝගීන්ගේ සුව පිණිස එය කළ යුතුමය. හිරේ දහසක දැමුවද මට මගේ යුතුකම මඟ හැරිය නොහැක. පිටතින් තුඬු මඟින් ඖෂධ ලබා ගැනීමට කොතරම් බාධා දැමුවද, රෝගීන්ගේ සුව පිණිස එය කළ යුතු නම්, කිසිම පැකිලීමකින් තොරව එය කරන්නෙමි. එලෙස සිදු කොට රෝගී සුව සහනය ලබා දෙන්නෙමි. *මාර දෙව් වෙත අභියෝග කරන්නෙමි.*

එහෙත්, මා හට ඔබතුමන්ලාගෙන් එක ඉල්ලීමක් කිරීමට ඇත. එලෙස ඔබතුමන්ලා විසින් අනුමත නොකරන, මෙම රජයේ හිඟ බෙහෙත් පිටතින් ගෙන්වා ගැනීම සඳහා තුඬු ලබා දී, යම් හේතුවක් නිසා සැකයක් හෝ යම්කිසි වැරදීමක් නිසා, මා හට *රිමාන්ඩ් බන්ධනාගාර ගත වීමට සිදුවුවහොත්*, අඩුම ගණනේ සෞඛ්‍ය අමාත්‍යාංශය මගින්, මාගේ නිර්දෝෂී භාවය ඔප්පු කරන තුරු රිමාන්ඩ් බන්ධනාගාරය තුළදී පහත සඳහන් දේ ලබා දෙන මෙන් ඉල්ලමි:

* දැන් මම වයසයි. ඒ නිසා මට *නිදා ගැනීමට පැදුරක්* අවශ්‍යයි.

* මදුරුවන්ගෙන් බේරෙන්න *මදුරු කොයිල්* එකක් රිමාන්ඩ් එකේ සිටින සෑම රාත්‍රියකටම එක බැගින් අවශ්‍යයි.

* මට රිමාන්ඩ් එකේ සිටින විට, *සමාජ විරෝධී ක්‍රියා* වලට රිමාන්ඩ් ගත වූවන් සමඟ එකට සිටිය නොහැක. ඒ නිසා පුළුවන් නම් වෙනම සිටීමට ඉඩ සලස්වන්න. මා වැනිම, මෙම හේතුව නිසාම රිමාන්ඩ් ගත වූ වෛද්‍යවරුන් සිටී නම්, මට ඔවුන් සමඟ සිටීමට සලස්වන්න.

* මම දවසකට එක වේලක් හරි හොඳින් ආහාර ගන්නා කෙනෙකි. ඒ නිසා, *කල්දේරම් බත් වෙනුවට ගෙදරින් බත් එකක්* ගෙනත් කන්නට ලබා දෙන්න. එසේ බැරිනම්, *පෙරේරා ඇන්ඩ් සන්ස් (Perera and Sons) එකෙන් වත් චිකන් බත් එකක්* ලබා ගැනීමට උදව් කරන්න.

* ඒ වගේම මගේ *දුරකථනය මා ළඟ තබා ගැනීමට* ඉඩ ලබා දෙන්න. මන්දයත් මාගේ සියලුම දේ ඒ තුළ ඇති නිසාත්, අන්තර්ජාලය මඟින් බොහෝ දැනුම් මා ලබා ගන්නා නිසාත්ය. එහි බිල නම් මට ගෙවීමට පුළුවන්.

* පුළුවන්කමක් තිබේ නම්, මා වෙනුවෙන් සෞඛ්‍ය අමාත්‍යාංශයෙන් *නීතිඥයෙකු* ලබා දෙන්න. එහෙමවත් බැරිනම්, එකත් මම කරගන්නම්. හැබැයි, එතුමාගේ ගාස්තුව ගෙවීමට මට *විපත් ණය (Distress Loan)* වත් ලබා ගැනීමට උදව් කරන්න.

ඉතින් මහත්වරුනි, මේ වගේ දෙයක් මට ලියන්නට හිතුණේ, මම, සහ අතීතයේ සිටි වෛද්‍යවරුන් මෙන්ම වර්තමානයේ සිටින වෛද්‍යවරුන් මෙන්ම, කෙතරම් ගැරහීමකට ලක් වුවද *සේවය පිණිසම කැපවී* සිටින නිසාය.

එමෙන්ම, මා මාගේ *සමාජ මාධ්‍ය මිතුරන් (බුකිවාසී සියලු දෙනාගෙන්)* ඉල්ලා සිටින්නේ, මම රිමාන්ඩ් ගත වුවහොත්, ඒ මා විසින් කරන ලද *දුෂණයක්* නිසා නොව, *රෝගීන් කෙරෙහි අනුකම්පාවෙන්* වෛද්‍යවරයෙකුගේ සේවය ඉටු කිරීමට ගිය නිසාය. ඒ නිසා, පුළුවන් නම් පමණක්, මා ගැන නොලියා සිටින්න.

මෙයට, ඔබේ විශ්වාසී,

සේවක,

*විශේෂඥ වෛද්‍ය මහෙන් කොතලාවල*