ශ්‍රී ලංකා ගල්අඟුරු ටෙන්ඩර් අර්බුදය (2025–2026)

 

ඉංග්‍රීසියෙන් මුලින් පල කරන ලද ලිපියේ පරිවර්තනයකි .  පරිවර්තනය ගූගල් ට්‍රාන්ස්ලේට් මගින් කල එකකි . 

මෙම ලිපියේ සපයා ඇති සියලුම දත්ත සහ තොරතුරු තොරතුරු දැනගැනීමේ අරමුණින් පමණක් ලබා දී ඇත. අන්තර්ජාලයෙන් ලබාගත් තොරතුරුවල නිරවද්‍යභාවය පිළිබඳව කතුවරයා වගකියනු නොලැබේ.

ශ්‍රී ලංකා ගල්අඟුරු ටෙන්ඩර් අර්බුදය (2025–2026)

ට්‍රයිඩන්ට් චෙම්පර් Trident Chemphar සමාගම 2025–2026 වාරය සඳහා මෙට්‍රික් ටොන් මිලියන 1.5ක (නැව්වාර 25ක) ගල්අඟුරු සැපයීමේ ප්‍රධාන ටෙන්ඩරය ජයග්‍රහණය කළේ මෙට්‍රික් ටොන් එකක් ඩොලර් 98.50 බැගින් වූ මිලකට ලංකා ගල්අඟුරු සමාගම (LCC) වෙත ලබා දීමටයි. කෙසේ වෙතත්, මෙම කොන්ත්‍රාත්තුව දැඩි විමර්ශනයකට ලක්ව ඇත්තේ පහත කරුණු හේතුවෙනි:

• ගුණාත්මකභාවයේ අසාර්ථකත්වය: දකුණු අප්‍රිකාවෙන් ලැබුණු නැව්වාර කිහිපයක් ස්වාධීන පරීක්ෂණාගාරයක් වන Cotecna විසින් සිදු කරන ලද පරීක්ෂණවලින් අසමත් වී ඇති බවට චෝදනා එල්ල වී ඇත. අධික අළු ප්‍රමාණය සහ අඩු තාපන අගය (Calorific Value) හේතුවෙන් මෙම තොග නියමිත ප්‍රමිතියෙන් තොර බව වාර්තා වූ අතර, එමඟින් ලක්විජය බලාගාරයට එහි උපරිම මෙගාවොට් 900 ක ධාරිතාව කරා ළඟා වීමට නොහැකි විය.

• මෙහෙයුම් ප්‍රමාදයන්: 2026 මාර්තු අග වන විට, සමාගම සිය කාලසටහනට වඩා බොහෝ පසුපසින් සිටි අතර, ඔවුන් විසින් ගොඩබා තිබුණේ 13 වන නැව්වාරය පමණි. නමුත් එම කාලය වන විට 19 වන නැව්වාරය ගොඩබා තිබිය යුතුව තිබුණි. මෙම ප්‍රමාදය හේතුවෙන් ශ්‍රී ලංකා රජයට හදිසි ටෙන්ඩරයක් හරහා මෙට්‍රික් ටොන් එකක් ඩොලර් 142 වැනි ඉහළ මිලකට ගල්අඟුරු මිලදී ගැනීමට සිදු විය.

• මූල්‍ය දඩුවම්: 2026 මාර්තු වන විට, ගුණාත්මකභාවය සහ සැපයුම් ගැටලු හේතුවෙන් Trident සමාගමට දළ වශයෙන් ඩොලර් මිලියන 8.1ක දඩයක් නියම කර ඇත.

• හදිසි ලංසු නුසුදුසුකම: පවතින ගැටලු මධ්‍යයේ වුවද, Trident සමාගම හදිසි ගල්අඟුරු ටෙන්ඩරය සඳහාද ඉදිරිපත් වූ නමුත්, ලංසු විවෘත කිරීමෙන් පසුව සිය මිල සංශෝධනය කිරීමට උත්සාහ කිරීම හේතුවෙන් ඔවුන්ව නුසුදුසුකම් ලැබූවන් ලෙස නම් කරන ලදී.

• දේශීය නියෝජනය: විමර්ශනවලින් හෙළි වී ඇත්තේ මෙම සමාගම ශ්‍රී ලංකාව තුළ නියෝජනය කරන්නේ Panaurora සමාගමට සම්බන්ධ දේශීය නියෝජිතයෙකු විසින් බවයි. මෙය ප්‍රසම්පාදන ක්‍රියාවලියේ විනිවිදභාවය පිළිබඳ පාර්ලිමේන්තු ප්‍රශ්න මතු වීමට හේතු වී ඇත.

ප්‍රධාන කාර්ය සාධන ගැටලු (ලක්විජය බලාගාරය)

ශ්‍රී ලංකා මහජන උපයෝගිතා කොමිෂන් සභාව (PUCSL) පවසන පරිදි, මීට පෙර භාවිතා කරන ලද උසස් තත්ත්වයේ රුසියානු ගල්අඟුරු මඟින් විදුලිය කිලෝවොට්-පැය එකක් නිපදවීමට ගල්අඟුරු ග්‍රෑම් 365ක් අවශ්‍ය වූ අතර, Trident සමාගම සැපයූ ගල්අඟුරු මඟින් එය නිපදවීමට ග්‍රෑම් 391 සිට 452 දක්වා ප්‍රමාණයක් අවශ්‍ය වී ඇත.

දේශීය නියෝජිතායතනය සහ පුද්ගලයින් පිළිබඳ විමර්ශනය

Trident Chemphar (TCPL) සමාගමේ දේශීය නියෝජනය පිළිබඳ විමර්ශනය කේන්ද්‍රගත වී ඇත්තේ 2025 මැයි මාසයේදී ලියාපදිංචි කරන ලද Panaurora (Pvt) Ltd සමාගම වටා ය.

ප්‍රධාන පුද්ගලයින් සහ ආයතන:

• සනත් බණ්ඩාර ජයසුන්දර: TCPL හි ප්‍රධාන නියෝජිතයා ලෙස හඳුනාගෙන ඇත. ඔහු ජාත්‍යන්තර ක්‍රිකට් කවුන්සිලය (ICC) විසින් වසර ගණනාවක තහනමකට ලක් කර ඇති හිටපු ක්‍රිකට් විශ්ලේෂකයෙකි.

• Panaurora (Pvt) Ltd: නිල දේශීය නියෝජිතයා ලෙස ලැයිස්තුගත කර ඇති සමාගමයි. එහි හිමිකාරිත්වය ප්‍රධාන වශයෙන් Invest LK (Pvt) Ltd සහ Sayaara Holdings අතර බෙදී ඇත.

• රඛිත නිර්මල රාජපක්ෂ: Invest LK හි අධ්‍යක්ෂවරයෙකු සහ කොටස් හිමියෙකි. ලංකා ගල්අඟුරු සමාගමේ වාර්තාවල සඳහන් වුවද, තම සමාගම් සහ TCPL අතර නිල නියෝජිත ගිවිසුමක් නොමැති බව ඔහු මාධ්‍ය හමුවේ ප්‍රතික්ෂේප කර ඇත.

• හක්මන නන්දාලෝක හිමි: Panaurora සහ Invest LK යන සමාගම් දෙකෙහිම අධ්‍යක්ෂවරයෙකු ලෙස කටයුතු කරන බෞද්ධ භික්ෂුවකි.

• H.B.A.O. හේරත්: Sayaara Holdings හි අධ්‍යක්ෂවරයෙකු වන මොහු Trident Chemphar සහ ලංකා ගල්අඟුරු සමාගම අතර අත්සන් කරන ලද නිල කොන්ත්‍රාත්තුවේ සාක්ෂිකරුවෙකු ලෙස අත්සන් කර ඇත.

විමර්ශන සොයාගැනීම් සහ තත්ත්වය (2026 මාර්තු)

පාර්ලිමේන්තු සහ මාධ්‍ය විමර්ශන මගින් කරුණු කිහිපයක් හෙළි කර ඇත:

1. ලියාපදිංචි කිරීමේ කාලය: Panaurora සමාගම ලියාපදිංචි කර ඇත්තේ ටෙන්ඩරය පිරිනැමීමට මාස කිහිපයකට පෙර වන අතර, TCPL සමාගම ලංකා ගල්අඟුරු සමාගමේ ලියාපදිංචිය ලබා ඇත්තේ ටෙන්ඩරය ප්‍රකාශයට පත් කිරීමට දින පහකට පෙරය.
2. අභ්‍යන්තර තොරතුරු කාන්දුවීම: හදිසි ටෙන්ඩරයකදී TCPL විසින් ඉදිරිපත් කරන ලද සංශෝධිත මිල ඊළඟ අඩුම ලංසුකරුට වඩා හරියටම ඩොලර් 1.00 කින් අඩු වීම සැකයට තුඩු දී ඇත.
3. දේශපාලන සම්බන්ධතා: දේශීය නියෝජිතායතනය සහ බලගතු දේශපාලන පුද්ගලයින් හෝ හිටපු අමාත්‍යවරුන්ගේ ඥාතීන් අතර පවතින බව කියන සම්බන්ධතා පිළිබඳව මහජන විරෝධයක් මතු වී ඇත.

මූල්‍ය බලපෑම සහ දඩුවම්

• මුළු දඩ මුදල: මේ දක්වා TCPL වෙත දළ වශයෙන් ඩොලර් මිලියන 8.1ක දඩයක් නියම කර ඇත.
• මෙහෙයුම් පාඩු: බාල ප්‍රමිතියෙන් යුත් ගල්අඟුරු හේතුවෙන් ලක්විජය බලාගාරයේ ධාරිතාව මෙගාවොට් 135 සිට 185 දක්වා ප්‍රමාණයකින් අඩු වී ඇත.

කළු ලැයිස්තුගත කිරීමේ අවදානම: "Umpire" පරීක්ෂණ මගින් ගුණාත්මකභාවය පිළිබඳ වංචාවක් තහවුරු වුවහොත්, TCPL සහ එහි නියෝජිත Panaurora සමාගම අනාගතයේදී බලශක්ති ටෙන්ඩර්වලින් ස්ථිරවම කළු ලැයිස්තුගත කිරීමට නිර්දේශ කර ඇත.

Trident Chemphar Limited (TCPL) සමාගම පිළිබඳ විස්තර

TCPL යනු 2007 පෙබරවාරි මාසයේදී ස්ථාපනය කරන ලද ඉන්දියානු රසායනික සහ වෙළඳ සමාගමකි. එහි මූලස්ථානය ඉන්දියාවේ තෙලන්ගානා ප්‍රාන්තයේ හයිද්‍රාබාද්හි පිහිටා ඇත.

විශේෂාංගය	විස්තර
පිහිටුවීම	2007 පෙබරවාරි 21
කළමනාකාර අධ්‍යක්ෂ	චිට්ටූරි කිරන් කුමාර් ගාරු
කර්මාන්තය	රසායනික ද්‍රව්‍ය, පෙට්‍රෝ රසායනික සහ ජාත්‍යන්තර වෙළඳාම
ආදායම	දළ වශයෙන් ඩොලර් මිලියන 5.1 (2026 වන විට)
නිල වෙබ් අඩවිය	tridentchemphar.com

මුලාශ්‍ර - බ්ලුම්බර්ග් වෙබ් අඩවිය 

සන්ඩේ ටයිම්ස් ශ්‍රී ලංකා -https://www.sundaytimes.lk/260301/news/conflicting-claims-compound-coal-crisis-633039.html

ලාංකික ගැහැනියගේ ජීවිතයෙන් බිදක් සොයා යන ..."ජෙරුසලමේ දූවරුනි"

 ලාංකික ගැහැනියගේ ජීවිතයෙන් බිදක් සොයා යන ..."ජෙරුසලමේ දූවරුනි"

උතුරු නැගෙනහිර වැන්දඹුවනගේ හුදකලා පීඩනයෙහි සංක්ෂිප්ත සංවාදයක් ඔස්සේ ආරම්භව ක්‍රිස්තියානි ආගමික ස්ත්‍රීත්වයේ විමුක්තිය පිළිබද සංකල්පනාව හා සමීපව යා වෙමින් ගෘහස්ත දිවිය තුළ නිරන්තරෙන් පීඩනයට පත් වන ලාංකික ගැහැනියකගේ අනුභූතියක් කේන්ද්‍රීය සංවේදී නිර්මාණයක් තරංගනී රෙසිකා ප්‍රනාන්දු "ජෙරුසලමේ දූවරුනි" නමින් 2023 වසරේදී නිර්මාණය කරනු ලබයි.

උතුරු නැගෙනහිර යුධමය වාතාවරණය තුළ සමීපතමයන් අහිමි වූ උතුරේද දකුණේද ස්ත්‍රීන් දෙස මානවීය දෘෂ්ටියක් හෙලමින් 'ජෙරුසලමේ දූවරුනි 'නිර්මාණය ආරම්භයේ පාඨක මනසට ප්‍රවේශ වේ.

එහිදී වැන්දඹුවන් දෙස හෙලන පෙරදිග සංස්කෘතික පසුගාමී දෘෂ්ටිය මෙන්ම මෙම ස්ත්‍රීන් වැන්දඹුවන් බවට පත්කරනු ලැබීමේ බලහත්කාරී දේශපාලනය පිළිබද හැගවුම්කරණයක් "ගෞරි"ගේ චරිතය හරහා නිරූපණය කරන්නට තරංගනී වෑයම් කරයි.

"මම වැන්දඹුවක් කියන්නේ මේ සමාජය.මහා අප්‍රසන්න වචනයක්. මං කැමති නෑ කවුරුවත් මට එහෙම කියනවට. අපි කවුරුවත් කැමැත්තෙන් වත් අපගේ වරදකින් වත් අපේ මිනිස්සු නැති කරගත්තා නෙමෙයි. අනික මං මගේ මනුස්සයාගේ මිනියක්වත් දැක්කේ නෑ. ඉතින් මං කොහොමද වැන්දඹුවක් වෙන්නේ..ඒක මේ සමාජය මං පිට බලෙන් තිබ්බ එකක්."

එසේම මානවීය සංවාදය හා මානවීය හැගීම් අවබෝධය සදහා භාෂාව අත්‍රික්‍රමණය කළ හැකි බව තරංගනී මෙම නිර්මාණය තුළ ගම්‍ය කරයි.

"අපි දැන් සිංහලෙන්ද දෙමළෙන් ද ඉංග්‍රීසියෙන් ද හස්ත මුද්‍රාවෙන්ද ඇසින් ද ස්පර්ශයෙන්ද නිහඬතාවයෙන්ද කියනා ඕනෑම කතාවක් තේරුම් ගත හැකි මට්ටමේ අන්‍යෝන්‍යය අවබෝධයකට එළඹී සිටියෙමු"

මනුෂ්‍යත්වයේ අසීමිත වේදනාවන් දෙස කතුවරිය බැලුම් හෙළනුයේ ඒ වේදනාවන් සුවපත් කිරීමට දිගුකාලීන දේශපාලන සමාජ ආර්ථික මානුෂීය ක්‍රියාවලියද අවශ්‍යතාව පිළිබද සියුම් ඉඟි කිරීමක්ද පෙරදැරිවය.

ළමා වියේ පටන් හමුදා කදවුරු වල ජීවිතය විසිරී සියල්ල අහිමු වූ මිනිස් සමූහයක වේදනාවේ මතකයන් සුවපත් කිරීමට හා අහිමි වූ ඔවුනගේ දිවිය යථාවත් කිරීමට වන දුෂ්කර දේශපාලන අභියෝගය

" ජෙරුසලමේ දූවරුනි " සියුම්ව ස්පර්ශ කරනු ලබයි.

"අපේ අම්මල අතුරුදහන් වෙච්ච දරුවෝ කෝ කියලා අහනව .දැන් අවුරුදු ගාණක් .උත්තර නෑ. යුක්තියක් සාධාරණයක් ගැන හැඟීමක්වත් නැති රටකින් මම මට නැති වුණු ජීවිතය ඉල්ලන්නේ නෑ . මේ සීතල කාමර වල ඉඳන් අඬා වැටුණාට අපේ ඇතුළෙ ගින්දර නිවෙන්නේ නැහැ. ඒත් අපි ගැන හිතන කතා කරන පිරිසක් දකුණෙත් ඉන්නවා කියලා දැනෙද්දි ගිනි ගහන අව්වෙ කුලී වැඩකට දුවද්දී පවා හිතට සැනසීමක් සන්තෝසයක් දැනෙනවා."

තරංගනී නිර්මාණය කරනා 'ගෞරිගේ' චරිතයෙහි අත්දැකීම් ස්පර්ශ කිරීමේදී මට "සමනල මරණය" ප්‍රබන්ධයෙහි

" වැන්දඹුවගේ සංවාදය" සිහිපත් කරයි.මා එම අත්දැකීම් ලබා දශක දෙකකට පසුවද එකී සමාජ ආර්ථික දේශපාලන පීඩනය එයාකාරයෙන්ම ප්‍රති නිර්මාණය කරන්නට අපට සිදු වීම දේශපාලන සමාජ ඛේදවාචකයකි.අපි දේශපාලන සමාජයක් ලෙස මානවීයත්වය ආරක්ෂා කර ගැනීමට කොතරම් අසමත්ද යන්න මෙයින් පිළිඹිඹු කෙරෙන දේශපාලන යථාර්ථයයි.

ජීවිතයම දුෂ්කර වධ වේදනාවක් ලෙසින් ගෙවා ගන්නා ගැහැනුන් අප වටා නිරතුරුව සැරිසරයි.එකී ගැහැනුන්ගේ වේදනාවන් පීඩාවන් නිමා කරලන සාමූහික සමාජ ගමනක් පිළිබද ලේඛිකාව සිහින දකියි..

නිර්මාණය පුරාම ක්‍රිස්තියානි ස්ත්‍රී විමුක්තියේ හා ප්‍රේමයේ පරමාදර්ශී චරිතය' මරියා' හෙවත් 'මීරියම්' සමග සංවාදයක් ගොඩ නංවා ඇත.හීබෲ බසින් 'මීරියම්' යන්නෙහි අරුත "සිදු තාරුකාව" යන්නය.මීරියම්, අදුරු දිවි දියඹක මග කියන පහන් තාරකාවක් සෙයින් සංකේතීයකරණය කරමින් ලේඛිකාව

'මීරියම් 'සමග කරන සංවාදය ට නිර්මාණය සිසාරා පුළුල් අවකාශයක් විවර කර ඇත.

"අමතක කරන්න එපා මැවීමේ පළමු කතාවෙහි සඳහන් වන්නේ දෙව් පියාණන් තමන්ගේම ස්වරූපයට අනුව පුරුෂයාද ස්ත්‍රියද වශයෙන් ඔවුන් මැවූ බව. මෙහිදී කිසිවෙකු උසස් හෝ පහත් වන්නේ නැහැ. දෙදෙනාම සමාන මනුෂ්‍යයන්..."

"නමුත් දෙවන මැවීමේ කතාව තුළ ඔබ ඔය මතු කරන අර්බුදය පවතිනවා. අපේ ඉතිහාසය කොහොමත් පුරුෂ මූලික දේව ධාර්මික ඉතිහාසයක්. පුරුෂ මූලික නම් ධාර්මික වන්නේ කෙසේදැයි ඔබ මවෙතින් විමසනු ඇත. නමුත් යථාර්ථය එයයි. අතීත ලියා කතා ලිව්වේත් කිව්වෙත් පිරිමින්. ඔවුන් ඇදහූවේත් පුරුෂ දෙවි කෙනෙක් ඔවුන් ගැහැණිය දකින්නේ පෘථග්ජන මිනිස් ඇසින් මිස විශ්වීය දිව්‍යමය මේ මනසකින් නොවේ. "ගැහැණිය අසම්පූර්ණයි" යන අදහස මුල් ශුද්ධ ලියවිලි ඉගැන්වීමක් නොවේ. ඒ පසු කාලීනව ග්‍රීක දර්ශනය නිසා ක්‍රිස්තියානි ට එක්වූ අදහසක්. නමුත් ඒ නිසා වන්දි ගෙවන්නට සිදුවූ ගැහැනුන් නම් අප්‍රමාණයි .. එය සත්‍යයක්.."

"ඒවා" කියන්නෙ ඉතිහාසය පුරා ජීවත් වූ ගැහැණුන්ගේ සංකේතාත්මය. අතීතයේ, වර්තමානයේ, අනාගතයේ වෙනත් අයුරකින් හඳුන්වනවා නම් ඇයයි නිදහස් මනුෂ්‍යයකු වන්නට පළමු පියවර තැබූ ගැහැණියගේ සංකේතය."

බයිබලයේ මිනිස් මැවීම පිළිබද උත්පත්ති කතාවෙහි ස්ත්‍රීත්වයෙහි ද්විතීයික භාවය සහ ඉතිහාසයෙහි මුල්ම ගැහැනියගේ සිට මේ දක්වා ගැහැනිය පිළිබද සාවද්‍ය කියවීම පිළිබද රූපකාර්ථයන් දෙස අභියෝගාත්මක දෘෂ්ටියක් හෙළන්නටද කතුවරිය 'මීරියම්' හරහා වෑයම් කරන්නීය..

සත්‍යය සාපේක්ෂ බැවින් ඉතිහාසය තුළ ස්ත්‍රීත්වය කෙරෙහි නව දෘෂ්ටිමය කියවීමක් ස්ත්‍රිය විසින් ගොඩ නැංවිය යුතු බවද මෙහිලා සියුම්ව අවධාරණය කරයි..

අධිරාජ්‍යවාදීන්ගේ... පාලකයන්ගේ..

බලලෝභීත්වය අතීතයේ සිට වර්තමානය දක්වා සාමාන්‍ය ජනයා පීඩනයට පත්කරමින් ඓතිහාසිකව ප්‍රතිනිර්මාණය වන අයුරු ද කතුවරිය මීරියම්ගේ දෙබස් හරහා ඉස්මතු කරයි.

"අපි මිසරයට පළා ගියා.දරුවාගේ ජීවිතය බේරගන්න.ඒත් අපේ දරුවා වෙනුවෙන් තවත් දහස් ගණනක් දරුවන්ට ජීවිතය දෙන්නට සිදුවුණා. ඒ බිළිඳුන්ගේ කෑ ගැසීම් ඒ මව්වරුන්ගේ හඬා වැටීම්. තවමත් මා දෙසවන් තුළ

දෝංකාර දෙනවා. පාලකයන්ට උවමනා තම පුතුන්ගේ හිස මත පමණක් කිරුළ තියෙනව දකින්න .තමන්ගේ පරපුරට පමණක් කිරුළ උරුම වෙනව දකින්න. ඒ නිසයි ඔවුන් මා පුතු පසු පස පැන්නුවේ .ඔවුන් සිතුවේ මා පුතුගේ උපත ඔවුන්ගේ ලෞකික රාජ්‍යයට අභියෝගයක් වේවි කියා ..."

"අධිරාජ්‍යයක පමණක් නොවෙයි ඕනෑම කුඩා රාජයක සිදුවන්නේත් එයමයි. එදා වගේමයි අදත් පාලකයන් ස්වකීය දරුවන්ගේ උරුමය රැක ගන්නට ඕනෑ තරම් රටේ දරුවෝ මරා දමාවි, කිසිදු හැඟීමකින් තොරව, දරුවන් ඔසවා ගන්නා, දරුවන් සිප ගන්නා, දරුවන් නළවනා දාරක ප්‍රේමය ඔවුන්ගේ කෙතරම් විහිළුවක්ද එය.."

"මා සිතින් දකිමින් සිටියේ තම නැති වූ දරුවන්ගේ පින්තූරය රැගෙන වීදි පුරා රැඳී ඉන්නා මව්වරුන්ය. කවදා හෝ තම දරුවන් නිවසට පැමිණෙනු ඇතැයි මග බලමින් සිටිනා අම්මලාය .යුද්ධයේදී මිය ගිය සෙබල පුතුන්ගේ නම සොයා දැවැන්ත ස්මාරකවල කුරා කුහුඹු අකුරු පිරික්සන විය පත් මව්වරුන්ය."

" ධනවතුන්ගේ බලවතුන්ගේ සිහින රාජයන් ගොඩනඟන්නට හැමදාමත් දිවි දුන්නේ දුප්පත් අම්මලාගේ දරුවන්ය."

"ලෝක ඉතිහාසයම අපේ දරුවන්ගේ ලේ කඳුළු වලින් නැහැවිලා. රාජ්‍යත්වය පිළිබඳ තෘෂ්ණාව බොහොමයක් මිනිස්සුන්ට ඉතිරි කළේ රිදවුම් පසුතැවීම් පමණයි."

'මීරියම්' හා ජෙරුසලමේ දූවරුනි කතා නායිකාව බලය පිළිබද ඓතිහාසික දේශපාලන යථාර්ථය විදහාලමින් සංවාදය ගලායාමට සලස්වයි.

විමුක්තියේ .. මානව ප්‍රේමයේ හා දරා සිටීමේ ඓතිහාසික සංකේතීය ගැහැනියක අභිමුඛව මානව ප්‍රේමය පෙරදැරි කරගත් වර්තමානයේ සමාජ දේශපාලන සංස්කෘතික පසුතලය තුළ පීඩනය අත්විදින ගැහැනියක වසර දහස් ගණනක පීඩිතයාගේ අද්දැකීම්හි සාම්‍යත්වය විහිදමින් සංවාදයට ගැනීම කතුවරියගේ අභිප්‍රාය විය හැකිය.

එහෙත් "ජෙරුසලමේ දූවරුනි "නිර්මාණය සිසාරා මේ සංවාදය වඩා වැඩි අවකාශයක් අත්පත් කර ගැනීම හරහා වර්තමාන නිමේෂයෙහි යථාව වඩා පුළුල්ව නිරූපණය කිරීමට තිබූ ඉඩ කඩ ඇහිරී යාම මෙන්ම මේ සංවාදයන්හි වන දීර්ඝ බව නිසා කියවන්නා වෙහෙසකර බවකට පත් වන බවක් මට හැගී යයි.මීරියම් හා සංවාදය වඩා සංක්ෂිප්තව නිර්මාණය කර වත්මන් ලාංකික ගැහැනියගේ ජීවිතය මෙයට වඩා ගැඹුරු ලෙස ග්‍රහණය කළා නම් "ජෙරුසලමේ දූවරුනි " වඩාත් අපූර්ව ලාංකික දේශපාලන නිර්මාණාත්මක කතිකාවක් ලෙසින් ගොඩ නැංවීමට තරංගනීට හැකිව තිබුණි.

කතා නායකාව රටෙහි පීඩිත කාන්තවන් සදහා යම් පිළිසරණක් වීමට වෘත්තිමය ජීවිතය තුළ අවකාශයක් හිමිකර ගත්තද සිය එක් කුස උපන් සහෝදරියගේ ජීවන පීඩනයේදී දෙදෙනා අතර වන දුරස්ත භාවය "ජෙරුසලමේ දූවරුනි " සංවාදයට ගනුයේ අපට මග හැරී යන සමීප මානුෂීය සහයෝගයන් හා සිතා බැලීම් පිළිබද යම් පු පුළුල් සිතා බැලීමේ අවකාශයක් විවර කරමිනි..

"ජෙරුසලමේ දූවරුනි " ප්‍රබන්ධය ආරම්භයේ සිට අවසානය දක්වා විවිධ දුක්ඛ දෝමනස්සයට චක්‍රීය ආකාරයෙන් මුහුණ දෙන මිනිස් සමූහයක් අපට මුණගැසේ..ඒ තුළ ජීවිතය උපේක්ෂාවෙන් දරා ගනිමින් බිද වැටුණු ජීවිත යළිත් ගොඩ නගා ගැනීමට හුදකලාව වැර දරණ ගැහැනුන් නිරූපණය වේ.සිය චිත්තවේගයන් පාලනය කර ගැනීමට නොහැකිව ජීවිතයේ ගැටලු බෙදා හදා ගැනීමට නොහැකි සංස්කෘතික පරිසරයක හුදකලාව ජීවිතය අතැර යන පිරිමින් හමුවේ.. යුද්ධය නිසා සැමියන් අහිමි බිරින්දෑවරු යුද්ධය නිසා පෙම්වතුන් අහිමිව හුදකලාවූ පෙම්වතියන්,සැමියන් අතැරයාම් හා සියදිවි නසා ගැනීම නිසා හුදකලා වන ගැහැනු,යුද්ධය නිසා දරුවන් අහිමි වියපත් මව්වරුන්,සිය දරුවන්ගේ අනේක ප්‍රශ්න මැද පීඩනය දරා සිටින වියපත් මව්වරුන් හා දෙමව්පියන්ගේ ගැටුම්,වියෝවන් මැද හුදකලාව සංකීර්ණ මානසික පීඩනයන්ට ගොදුරුවන දරුවන් ගෙන් සම්ම්ශ්‍රිත.."ජෙරුසුලමේ දූවරුනි " විවිධ ජීවන අනුභූතිමය පරාසයකින් විහිදෙන වර්ණාවලියක් සිතුවම් කරයි.

ලංකාවෙහි විවිධ පළාත් හි ස්ත්‍රීන් පෙළන සමාජ ආර්ථික හා මානසික පීඩනයෙන් මුදවා ගැනීම සදහා ඔවුන්ව සමාජ ආර්ථිකව බල ගැන්වීමේ රාජ්‍ය නොවන ව්‍යාපෘතියක වැඩ කටයුතු මැද අවිවේකී දිවියක් ගෙවන මැදිවියට ළගා වෙමින් සිටින තැනැත්තියක සිය සහෝදරියගේ දෙවන සැමියා සිය දිවි නසා ගැනීමේ අනපේක්ෂිත පුවත සැලව උපන් ගම්මානය වෙත පැමිණෙයි. එහිදී තමාද,සිය සොයුරිය ඇගේ දෙවන විවාහය සමග මවගෙන් වෙන්ව සිටින නව යොවුන් වැඩි මහල් දියණිය හා දෙමව්පියන් ඇතුලු සමස්ත පවුල මේ ක්ෂිතිමය මනෝභාවය සංස්කෘතික හා මානවීය වශයෙන් අත් විදින ආකාරය සිනමාත්මක හා කවීත්ව

භාෂාත්මක අත් හදා බැලීමක් හරහා තරංගනී පාඨකයා වෙත සමීප කරවීමට නිර්මාණාත්මක අත් හදා බැලීමක් කර ඇත.

මෙහිදී මානව සබදතා හා චර්‍යාවන් පිළිබද අප තුළ වන පටු දෘෂ්ටිමය කියවීම් හා මානව ඛේදාන්ත හමුවේ සමාජ සංස්කෘතික තිගැස්ම තුළින් හටගන්නා ප්‍රතිචාරයන්හි වන රළු හා මුග්ධත්වය විදහාලීමටද කතුවරිය උත්සාහ කරයි.

"ජෙරුසලමේ දූවරුනි" තුළ" යුද්ධයෙහි ගොදුරක්ව මිය යන හමුදා භටයකුට පාසැල් වියේ සිට පෙම් බැදි ඔහු ගේ මරණයෙන් මතුවද ඔහු කෙරෙහි වන අධ්‍යාත්මික ප්‍රේමයෙන් උපේක්ෂාවෙන් ජීවිතය දරා සිටින " බුලත් අරමෙහි ලොකූ "මෙන්ම , ජීවිතයේ කෙටි කලක් තුළ සැමියන් දෙදෙනෙකුම අතැරයාම හා සියදිවි නසා ගැනීම නිසා අහිමිව දියණියන් දෙදෙනෙකු සමග හුදකලා වන සොයුරිය ජීවිතයේ දුක්ඛ දෝමනස්ස මැදින් ප්‍රේමයම දරා ගනිමින් ප්‍රේමයම සොයා යමින් සමස්ත සමාජයට ප්‍රේමයම පුදමින් ඉදිරියට පියමනින ස්ත්‍රීත්වයේ.. ශක්තියේ... ප්‍රතිමූර්තියන්‍ ය..

"ඔයා එල්ලුණා බාල්කේ...මම එල්ලුණා ජීවිතයේ .." ජීවිතයේ අනේක විද අර්බූද හමුවේ පිරිමියා මරණය සමග යා වෙද්දී ජීවත් වීම සදහා අරගල කරන ගැහැනිය පිළිබද රූපකාර්ථයෙහි අරුත් උද්දීපනය කිරීමට තමා කියවමින් සිටින ප්‍රබන්ධයක මාර්තුකාවක් කතුවරිය කතාව තුළ වරින් වර මනාව සුසංයෝගී කර ගැනීම අපූර්වය.

2017 දී පළ කළ "දේශ ද්‍රෝහියාගේ නිර්මල හෘදය" පළමු නවකතාවෙහි සිට තරංගනී ඇය සතු කවීත්ව බස් වහර ඔස්සේ "ජෙරුසලමේ දූවරුනි " හරහා නිර්මාණාත්මක හා දෘෂ්ටිමය වශයෙන් වඩා ඉදිරි මාවතකට ප්‍රවේශ වී ඇති බව පිළිඹිඹු වේ.

නිදහස් ප්‍රේමයක් පිළිබද නැවුම් සංවාදයක්ද මෙම නිර්මාණයෙහි යටි පෙළ ගලා යාමට සලස්වන නමුදු ගැහැනියගේ අභ්‍යන්තරික ප්‍රේමයට ඉහළින් දිව්‍යමය තලයකට පෙම්බරා ඔසොවා තබන්නට ඔවුනතර වන ඇතැම් සංවාද සහ ස්වයං ආත්ම භාෂණය ඔස්සේ කතුවරිය වෑයම් දරා ඇතැයි

සිතේ.

පෙම්බරා සේම පෙම්බරියගේද මානවීය ප්‍රේමයේ වටිනාකම් හා ජීවන අවබෝධය සමාජ කියවීම් සමපාත වන නව දෘෂ්ටිමය තලයක ලාංකික දේශපාලන සමාජ සංස්කෘතික සංදර්භයයෙහි යතාවෙහි නව වර්ණාවලියක් වඩා පුළුල් පථයක ප්‍රති නිර්මාණය කරන්න තරංගනී රෙසිකා ප්‍රනාන්දුට මගේ ආදරණිය සුභාශිංසන පිරිනමමි..

--තිලිනා වීරසිංහ--

--2026 මාර්තු 30--

කළු කෙල්ලෙක්ව නැටුම් තරඟයට තෝරගන්න

 

කළු කෙල්ලෙක්ව නැටුම් තරඟයට තෝරගන්න මට ඒ හැටි පිස්සුවක් නෑ තේමිය සර්. ලස්සනට නටන්නත් පුළුවන්,රූපෙනුත් අඩුවක් නැති සමාධිව තෝරගන්නෙ නැතුව හංසමාලිව තෝරගන්නෙ අහවල් එකකටද??ඔයා ඔයාගේ වැඩක් බලාගෙන ඉන්න තේමිය සර් "

කේතකී තේමියට දොස් තැබුවේ තමන්ගේ කාර්යන් වලදි තේමියවත් වෙන අයෙක් දිහා පාසලේ විදුහල්පතිවරයාවත් ඇඟිලි නොගැසිය යුතු බව හේත්තු ගැන්වෙන පරිදිය.

" හංසමාලිගේ රූපේ මොන අඩුවක්ද? මන් මගේ ඇස් දෙකෙන්ම දැක්කනේ ඒ දරුවා අනිත් අයට වඩා ලස්සනට නටනවා.දක්ශතාවය තියෙන ලමයෙක්ට තැන නොදී පෞද්ගලික හිතවත්කම් නිසා සමාධිව තරගෙට දාලා මිස් ඇඟ බේරගන්න නේද හදන්නෙ?"

තේමිය උපහාසයට මෙන් කේතකීට කීවේ කට කොනින් සිනාසෙමිනි.

" හැම පාරම මන් මේ ඉස්කෝලෙන් ලමයින්ව සමස්ත ලංකා වෙනකන්ම අරන් ගිහින් තියෙනවා. එහෙව් එකේ මගේ තෝරාගැනීමේ වරදක් වෙන්නෙ නෑ කිසිම දවසක.නැටුමේ ලාලිත්‍ය උනත් වැඩි වෙන්නෙ ලස්සන කෙනෙක් නටද්දි , මන් මේ කිසිම ලමයෙක්ව පහත් කරලා කතා කරනවා නෙවෙයි තේමිය සර්! මේ සබ්ජෙක්ට් එක ඔයාට අදාල නැති නිසා ඔයාට මේ දේවල් තේරෙන්නෙ නෑ "

නැවතත් කේතකී කතාව පටන්ගත්තාය.කේතකීගේ පුරාජේරුවේ නම් අඩුවක් නැත.ඇය සියලු සත්වයෝට එක සේ සැලකිය යුතු බැව් පැවසුවත් ක්‍රියාවෙන් එය ඔප්පු නොකෙරුවේය.

" විද්‍යාවයි නර්තනයයි අතරේ ලොකු වෙනසක් තියෙනවා තමයි කේතකී මිස්. ඒත් අහලා තියෙනවද ඩාවින්චි ගැන? චිත්‍ර ශිල්පියෙක් වගේම විද්‍යාඥයෙක් විදිහට මිනිස්සු එයාව හඳුනගත්තා,ඒ අතීතයේ. වර්තමානයේ මිනිස්සු එක ක්ශේත්‍රයකට අවදානය යොමුකරාම අනිත් පැත්‍ත ගැන හොයන්නෙ නෑ.ඒකෙන් වෙන්නෙ මිනිස්සුන්ගේ දක්ශතා ටිකෙන් ටික ක්ශය වෙන එක..."

තේමිය දාර්ශනිකයෙන් මෙන් කතා කරනවිට කේතකී නළල රැළි ගන්වා ගනිමින් තේමිය දෙස බලා සිටියාය.ඔහු යන්නෙ කොහෙද මල්ලෙ පොල් මෙන් අදාලත්වයක් නැතිව කියවන බැවිනි.

" මට ඔය දර්ශනය අනම් මනම් තේරෙන්නෙ නා තේමිය සර්,ඒක මගේ සබ්ජෙක්ට් එක නෙවෙයිනේ."

" එහෙම නම් කේතකී මිස් තමන්ගේ සබ්ජෙක්ට් එක හරියට කරන්න එපැයි."

නැවතත් තේමියගේ මුවේ උපහාසාත්මක සිනහවක් රැඳෙනු දුටු කේතකී තේමියව ගොළු කරනු වස් යමක් කියන්නට විය.

"" නර්තනය කියන එක සමාධිගේ ලේවලම තියෙනවා. සීයලා මුත්තලා පරම්පරාවේ ඉඳන් සාම්ප්‍රදායික නැට්ටුක්කාරයොලු.ඒ නිසා සමාධි එක්ක ඔය හංසමාලි කියන දරුවට හැරෙන්නවත් බැරිවෙයි. මන් යනවා තේමිය සර්!"

කේතකී එසේ කතාවට අලගු තබමින් ගුරු විවේකාගාරයේ සිට නැටුම් කාමරය දෙසට පිය මනින්නට විය.

" සම්ප්‍රදායට බම්බු ගහන්න කියපන් මිස් කේතකී"

තේමියට එසේ කියන්නට සිත්වුණද එසේ නොකියා තමන්ට විතරක් ඇසෙන සේ මුමුණාගත්තාය.

කේතකී සමාධි ඇතුලුව සිසුන් කිහිපදෙනෙකු කිහිපවතාවක් තරඟවලට රැගෙන ගොස් තිබේ. හැමවරම එක් සිසුවියක හෝ සමස්ථ ලංකා තරගවලට පිවිසීමට වරම් ලැබ ගත්තද ඉන් ජයග්‍රහණය කරන්නට නොහැකි විය.මෙවරද අට වසරේ ඉගෙනුම ලබන සමාධි ඇතුලු නොයෙක් පන්තිවල සිසුන් තරඟවලට පුරුදු පුහුණු කරනුයේ ඔහුන්ට විවේකයක්වත් නොදී අනුකම්පා විරහිතව හැසිරෙමිනි. එක්තරා දිනක නැටුම් කාමරය අසලින් යනවිට අට ශ්‍රේණියේ දරු දැරියන් නර්තනයේ යෙදෙන අයුරු මද වෙලාවක් බලා සිටියාය.එහි හංසමාලි දක්ශ ලෙස නර්තනයේ යෙදෙනු දුටුවාය.

තරඟා සඳහා තෝරාගැනීම් වලින් අනතුරුව සෑම කාලච්ජේදයකම සමාධි නැටුම් කාමරයේ සිටීම තේමියගේ විශ්මයට කරුණකී.දක්ශතම දරුවා පන්තිකාමරයේ සිටින විට වෙනත් අයෙකු තරඟා සඳහා යැවීමට වෙහෙසවන කේතකී ඔල්මාදයකින් පෙලේදැයි කෙලින්ම විමසීමට තේමියට සිත්වුනද ඒ සඳහා අවස්ථාව ලැබෙන තුරු බලා සිටියේය.කේතකී සහ තේමිය අතර සංවාදය ඇරඹුනේ ඉන් පසුවයි.

විද්‍යා කාලච්ඡේදය ඇරඹුනු විට තේමිය අට ශ්‍රේණිය පන්ති කාමරය දෙසට පියනගන්නට විය. දරුවන්ගේ කෑ කෝ ගැසීම් වල එදා මෙන්ම අදත් අඩුවක් නැතැයි තේමියට සිතුනි. නමුත්,

" අපි පොඩි කාලේ කරපු දාංගලේ හැටියට මේ මදි "

යැයි තේමියට සිතුනි. ඔහු එනු දුටු දරු දැරියන් මීයාට පිම්බාක් මෙන් නිහඬ විය.ඔහු පන්තිකාමරය සිසාරා නෙත් විහිදුවිය.

" සමාධි නෑ නේද?"

තේමිය කටහඬ අවදි කලේය.

" නෑ සර් එයා නැටුම් පුරුදු වෙන්න ගියා"

එක් දැරියක් කියද්දි තේමිය ඔලුව වනා එදින පාඩම ආරම්භ කලේය..
කේතකී උපරිම ප්‍රයත්නයක් දරා දරුවන් පුරුදු කරවා නැටුම් තරඟය සඳහා රැගෙන ගියේ,

" මේ සැරේ නම් සමස්ථ ලංකාත් දිනලම තමයි මන් පස්ස බලන්නෙ "

යැයි මහත් උජාරුවෙන් කියමිනි.කලාප තරඟ වලින් කිහිපදෙනෙකු ජයලබා ඇති බව දැනගත් විදුහල්පතිවරයා කේතකීව මුරුංගා අත්තේ තැබුවේ අනෙක් ගුරුවරුන් සමග ගුණ වර්ණනා කරමිනි. එනිසාවෙන්ම කේතකී උනන්දුවෙන් පුරුදු කිරීම් කටයුතු අඛණ්ඩව කරගෙන ගියේ පළාත් තරඟ සඳහා වඩාත් හොඳින් මුහුණ දීමේ බලාපොරොත්තුවෙනි. නමුත් කේතකීගේ සියලු බලාපොරොත්තු බිඳ දමමින් ගියවර සමස්ථ ලංකා තේරීපත්වූ දැරිය හෝ සමාධි සමස්ථ ලංකා තරඟ සඳහා වරම් ලබාගත්තේ නැත .කඩවූ බලාපොරොත්තු සහිතව කේතකී සති ගණනාවක් හිතේ අමාරුවෙන් සිටියත් පසුව ඇය සාමාන්‍ය පරිදි තම කටයුතු කරගෙන ගියේය .

පාසලේ උත්සව සඳහා නටන සෑම විටකදීම කලු කෙල්ලන් පසු පෙලත් සුදු කෙල්ලන් ඉදිරිපෙළත් සිටින සේ නර්තනාංග සකස් කිරීම සුපුරුදු පරිදි විය .පසුපෙල දැරියන් කොතරම් හොඳට නර්තනයේ යෙදුනත් පසුපෙළ බැවින් එහි සුන්දරත්වය නෙත ගැටුනේ කිහිපදෙනෙකුගේ පමණි.තේමියද ඉන් එක් අයෙකි.

කේතකීගේ වයස හතලිහට ආසන්න වුවද තවමත් හිරිමල් යෞවනයේ සිටින ගැටිස්සියක් මෙනී. පැහැපත් හමක් හිමි ඇයට දුප්පත් දරුවන් කෙරෙහි එතරම් ප්‍රියතාවයක් නොමැත.
මාස හත අටක් ගතවිය. ඒත් සමඟම කේතකීගේ වෘත්තීය කාල සීමාව අහවර වී වෙනත් පාසලකට මාරුවීමක් ලැබුනි. ඇය පාසලෙන් අස්ව යෑමේ නිමිත්තෙන් පාසල් සිසුන් සහ ගුරුවරු එක්ව උත්සවයක්ද සූදානම් කර තිබුණි.එදින බොහෝ දැරියෝ අඬා වැලපුනේ වැලහින්නියන් මෙනී.

" අලුත් ඉස්කෝලෙකට යන නිසා මිස්ට මගෙන් සුබ පැතුම්"

අනෙක් අයව අනුකරණය කරමින් තේමියද ඇයට සමුදුන්නේ සුබ පතමිනි.

" සර්ට නම් සතුටුයි වගේ "

කේතකී මදක් රවා බලමින් කීවේ නුරුස්නා ස්වරයකිනි.අනෙක් ගුරුවරුන් "අනේ මිස් මට හරිම දුකයි,මිස්ගේ අඩුව පුරවන්න වෙන කාටවත් බෑ,ආයේ අපිව බලන්න එන්න යැයි"
කීවද තේමිය එසේ නොකීම කේතකීගේ සිත් තැවුලටත් කෝපයටත් හේතුවිය.

" එහෙම විශේෂයෙන් සතුටක් නෑ මිස් .හමුවුනොත් අනිවාර්යයෙන් සමු දෙන්නම වෙනවා ඒකයි ලෝක ධර්මතාව.කොහොමත් අලුතෙන් නැටුම් වලට ගුරුවරයෙක් එනවා නේ ඒ නිසා සතුටුයි"

" සර්ගෙ සබ්ජෙක්ට් එක සයන්ස්ද නැත්තන් බුද්ධ ධර්මයද?? මන් නම් කියන්නෙ සර් ඔය දෙකම නැතුව නැටුම් ඉගැන්නුවනම් හරි. සර් කොහොමත් මන් ලමයින්ව තරඟ වලට අරන් යන එක ගැනයි තෝරගන්න ළමයි ගැනයි ගොඩක් උනන්දුයි නේ "

කේතකී ඇසුවේ තේමිය දෙස බල සිනාසෙමිනි.එය මිත්‍රශීලී සිනහවක් නම් නොවේ .එය උපහාසාත්මක සිනහවකි. මෙම කතාව තව දුර ගියහොතින් කේතකී යකින්නක් වී තමන්‍ට බැන වැදීමටද ඉඩ ප්‍රස්තාව ඇති බැවින් සංවාදයට අලගු තැබුවේය.

" ම්ම්ම් ඒක ගැන කතා කරන එක අත්හැරලා දාමු .අද වගේ දවසක නිකන් බොරුවට හිත් අමනාපකම් ඇති කරගන්න ඕන නෑ කේතකී මිස් ,වැරදි දෙයක් කියවුනා නම් සමාවෙන්න."

" මන් මගේ සබ්ජෙක්ට් එක හරියට කරා තේමිය සර්.මන් නම් හිතන්නෙ නෑ අලුතෙන් එන අයටවත් මෙච්චර කැපකිරීමක් කරන්න පුලුවන් වෙයි කියලා.. මන් ආසම නැත්තෙ මගේ සබ්ජෙක්ට් එක ගැන අබමල් රේණුවක් තරම්වත් අවබෝධයක් නැති අය මට උපදෙස් දෙන්න එනවට"

කේතකී තේමියගේ මුහුණ හරහා යන සේ පහරක් ගැසුවේ තම වචන වලිනි.නමුත් එය තේමිය කිසිත්ම සිතට ගත්තේ නැත.

" කේතකී මිස් අහලා තියෙද කඳුගොඩ ගුරුන්නාන්සේ ගැන"

" ඔව් මොකද නැත්තේ එයා ගොඩක් ප්‍රසිද්ධයි නේ. එයා තරන් නැට්ටුවෙක් අහල ගම් හතකවත් නෑ කියලයි අපේ අම්මා නම් කියන්නෙ. ඇයි එයා ගැන අහන්නෙ"

කේතකීගේ මුවේ ප්‍රශ්නාර්තය මුසු බැල්මකි.කේතකීගේ මව කෙල්ල කාලේ කඳුගොඩ ගුරුන්නාන්සේ හැබැහින්ම කිහිපවරක් දැක තිබෙන බවත් ඔහුගේ තේජාන්විත නර්තනයට කාටවත්ම ලංවිය නොහැකි බව ඇය වරක් පවසා ඇති බව කේතකීට සිහිවිය.

" ඒ මගේ සීයා , දවසක ඇවිත් යන්න මිස් අපේ ගෙවල් පැත්තේ "..

තේමි‍ය එසේ පවසා එතැනින් පිටත්ව ගියේ කේතකීව පුදුමයෙනුත් පුදුමයට පත් කරමිනි.

" මේ මනුස්සයා මේ කිව්ව කතාව ඇත්තක්ද ? වෙන්න බෑ"

කේතකී තමාටම කියාගත්තේ වික්ශිප්ත දෑසින් යුතුව ඔහු නොපෙනී යන තෙක්ම බලාසිටිමිනි.
ඔහු මෙම පාසලට විත් අවුරුද්දකට ආසන්න කාලයක් වේ.විසිඅට හැවිරිදි තේමිය ගුප්ත පුද්ගලයෙකු බැවින් වැඩි විස්තර දැනගැනීමට කා හටවත් නොහැකි විය. අවසානයේ පාසලේ විදුහල්පතිවරයා මාර්ගයෙන් කේතකීට දැනගන්නට ලැබුනේ තේමිය කියූ දෙය සත්‍යක් බවත් ඔහු වෙස් තැබූ නැට්ටුවෙක් බවත්ය.

කේතකී පාසලෙන් ගිය විට නර්තන විශයේ පුරප්පාඩුව පිරවීමට අයෙකු නැති විය.එය මහත් ගැටලුවක් බවට පත්විය.

" කේතකී මිස් නැති පාඩුව තදින්ම දැනෙනවා. ඒ පුරප්පාඩුව පුරවන්න කෙනෙක් එන්න ටික දවසක් යයි.මේ වගේ අති දුශ්කර පළාත්වලට පත්වීම් අරන් එන්න කවුද තමයි ඉතින් කැමති"

විදුහල්පතිවරයා එලෙස ආපනශාලාවේ හිඳ වසන්ත ගුරුගේ නොහොත් ගුරුගේ සර් යැයි සියල්ලෝම ආමන්ත්‍රණය කරන පාසලේ උප විදුහල්පතිවරයාට පවසන්නට විය. එසේ පවසන විට තේමිය සහ ඉතිහාසය ගුරුවරයා වූ සුසන්‍තද අසල විය.

" ඔව් නේද සර් , මිස් හිටියා නම් කොහොමහරි ළමයි ටික පුරුදු කරලා නැටුම් තරඟ වලට අරන් යනවා .මේ පාර ඒකත් බැරිවෙයි වගේ"

ගුරුගේ පැවසුවේ ඇය නැති පාඩුව ගැන සිතමිනි.

" ඔව් තව මාස දෙකකටත් අඩු කාලයයි තියෙන්නෙ තරඟ වලට.මටනම් ඔය සම්බන්ධයෙන් ලොකු අදහසක් නෑ. ඒක නෙවෙයි ගුරුගේ සර් අපිට බැරිද ස්ටාෆ් එකෙන් කවුරුහරි අලුත් මිස් එනකන් මේ වැඩේට දාන්න.නැටුම් කරපු කවුරුමහරි ඇතිනේ."

විදුහල්පතිවරයා එසේ කියමින් කල්පනා කරන්නට විය.තේමියා හාවක් හූවක් නැතිව තේ එක බොන්නට වූයේ තමා විද්‍යා ගුරුවරයෙක් වූ නිසා තමන්ගේ දිහාවට කාගෙවත් නෙත යොමු වන්නෙ නැති බව දන්නා නිසායි.

" එහෙම කෙනෙක්නම් නෑ සර්.නැටුම් ගැන දන්නෙ නැතුව ගුරු අත්පොත බලාගෙනවත් කියලා දෙන්න පුළුවන් විශයක් නෙවෙයිනේ මේක.එහෙම එකේ තරඟ වලට යවන්න පුරුදු කරන්නත් කෙනෙක් හොයාගන්න බැරිවෙයි."

ගුරුගේ එසේ පවසා සුසන්තගේ මුහුණ දෙස බැලීය.

"අපොයි මම නම් දන්නෙ නෑ ඕවා, සිංහල වගේ සබ්ජෙක්ට් එකක් උනත් උගන්නන්න පුළුවන් නැටුම් කොහොමද??"

සුසන්ත ගැලවෙන්නට මෙන් කතා කරද්දි ගුරුගේට සිනහා පහළ විය.

" මන් නිකන් බැලුවේ සුසන්ත සර් "

" හා ඒක මිසක්"

සුසන්ත සිනාසුනේ කවටයෙක් මෙනී.ඔහු සිනාසෙනු දුටු විදුහල්පතිවරයා හැරුනේ තේමිය දෙසයි.තේමිය තේ උගුරු කිහිපය එක හුස්මට බී දැම්මේ කලබලයෙනි.

" තේමියට පුළුවන් නේ ළමයින්ව තරඟ වලට අරන් යන්න පුරුදු කරවන්න.වෙස් පැළඳපු නැට්ටුවෙක් තියාගෙන අපි මොකටද වෙන අයව හොයන්නෙ"

විදුහල්පතිවරයා එසේ පැවසුවද විද්‍යාව උගන්වන අතරතුර නැටුම් පුරුදු කරවීම මහත් ගැටලුවක් විය.දවසට එක් කාලච්ජේදයක් හෝ දෙකක් හිස්වුනද මේ කාර්යය සඳහා එය ප්‍රමාණවත් නොවෙනු ඇත.

" ඒත් මන් හිතන්නෙ නෑ සර් මේක කරන්න පුළුවන් වෙයි කියලා.මගේ සබ්ජෙක්ට් එකත් උගන්නන ගමන් මේ වැඩෙත් කරන්නෙ කොහොමද??අනික ෆ්‍රී පීරියඩ් එහෙමත් මට වැඩියේ නෑනේ"

" හා ඒක ගැන වැඩියේ හිතන්න එපා තේමිය සර්..අපි මෙහෙම කරමු හවසට පැයක් වගේ දාගෙන ළමයින්ට නැටුම් පුරුදු කරමු. කොහොමත් බෙර ගහන්න එහෙම පිරිමි දරුවෝ ඉන්නවනේ ඒ නිසා ගැහැනු දරුවෝ හවස නවත්තගන්න එකේ ප්‍රශ්නයක් වෙන එකක් නෑ.එහෙම දෙමව්පියන්ට ප්‍රශ්නයක් නම් කාගේ හරි දරුවෙක්ගේ අම්මෙක්ට මාරුවෙන් මාරුවට ඇවිත් ඉන්න කියනෙකයි තියෙන්නෙ "

මෙය විදුහල්පතිවරයා ක්ශනිකව ගත් තීරණයක් නොවන බව තේමියට තේරෙන්නට විය.ඔහුට එම ඉල්ලීම ප්‍රතික්ශේප කරන්නට නොහැකි විය. තේමිය සෑම පන්තියකින්ම තරඟ වලට තෝරාගත්තේ සාම්ප්‍රදායික ලෙස හැම පාරම තෝරගන්නා ළමයාව නොවේ. සෑම පන්තියකම නැටුම් කරන ළමුන් අතරින් දක්ශ සිසුන් තෝරාගෙන එහිනුත් දක්ශතමයා තෝරාගැනීම ඔහුගේ වැඩපිළිවෙළ විය. එහිදී සමාධිව පරයා හංසමාලි දක්ශ ලෙස නර්තනයේ යෙදුන බැවින් තරඟ සඳහා තේරිපත් වූයේ හංසමාලියි.

පුරුදු කිරීම් වැඩ කටයුතු දෛනිකව සිදුවුනි.නමුත් එක්දිනක් හංසමාලි නොපැමිණි නිසාවෙන් තේමිය ඇගේ මිතුරිය වන කවීශාගෙන් හේතු විමසා සිටියේය.

" පුතේ ඇයි අද හංසමාලි ආවේ නැත්තෙ, ඔයා එයාලගේ ගෙවල් ළඟද??"


දැරිය උඩබිම බලන්නට වූයේ මදක් පැකිලෙමිනි.

" නෑ සර් අපේ ගෙවල් ගාව නම් නෙවෙයි එයාලා ඉන්නෙ.එයා ඊයේ කිව්වා අද එන්න වෙන්නෙ නෑ කියලා"

" ඒ ඇයි"

තේමිය එක හෙල්ලේ බලාසිටියෙන් කවීශා හේතුව පවසන්නට විය..

" එයාගේ ජීන්ස් එක ඉරිලා තිබ්බෙ සර්.අලුත් එකක් ගන්න ඕන අම්මා වැඩ කරන තැනින් පඩි ලැබුනම කිව්වා. කේතකී මිස් නම් ළමයි ජීන්ස් ගෙනාපු නැති දවසට නැටුම් කාමරේ ඉස්සරහා දණ ගස්සනවා ඒකයි එයා අද එන්නෙ නෑ කිව්වෙ"

කවීශා පවසද්දි තේමියගේ පපුවට අමුතු දුකක් දැනුනි.ගම්බද ප්‍රදේශවල යමක් කමක් ඇති පුද්ගලයක් සිටින්නෙ අතලොස්සකි.අන් සියල්ලෝම එදිනෙදා කෑම වේල සරි කරගන්නට අව් වැසි නොබලා වැඩ කරන දුගී ජනයාය.

පාසල නිමාවී හංසමාලිගේ නිවසට යන මාර්ගය දන්නා පිරිමි ලමයෙක්වද කැටුව ටවුමට ගොස් තේමිය අලුත් ජීන්ස් එකක් මිලදී ගත්තේ හුදෙක්ම හිතේ උපන් දුක නැති කරගැනීම පිණිසයි.

" අර තියෙන්නෙ සර් ඒක තමයි හංසමාලි නංගිලාගේ ගෙදර"..

පොල් වත්තක් මැද තිබූ කුඩා නිවසක හංසමාලි සහ මව පියා පදිංචි වී සිටියෝය. තමන්ට බිම් අඟලකවත් ඉඩම් ප්‍රමාණයක් නොමැති බැවින් ඔහුන් එහි නතර වී සිටියේ පොල්වත්තද රැකබලාගනිමිනි.

මෝටර් සයිකලයේ ශබ්දය ඇසෙත්ම හංසමාලි දොරෙන් එබී බැලුවේ කරුන්දැයි කියායි.තේමියව අඳුරගත් හංසමාලි මිදුලට බැස්සේ සිනාසෙමිනි .

" හංසමාලි අද ඉස්කෝලේ නාවේ ඇයි කියලා බලන්න ආවේ"

" එන්න බැරිවුනා සර්!".

ඇය ඒ හැරෙන්න වෙන හේතුවක් පැවසුවේ නැත.ඒ සමඟම කුස්සියට වී උයමින් සිටි ඇගේ අම්මා ඇය ඇඳගෙන සිටි චීත්ත පොටෙන් අතද පිසදමමින් එලියට ආවේ ඇවිත් සිටින්නේ කවුරුදැයි බැලීමටයි. තේමියව අඳුනන බැවින් ඇය දත් පෙන්වා අහිංසක ලෙස සිනාසීය.

" සර් මොකද මේ හිටගෙන .දුවේ පුටුවක් ගේන්න සර්ට"

ඇය පවසත්ම

" නෑ ඕන නෑ හංසමාලිගේ අම්මේ දැන් අපි යන්න ඕන.මන් මේක හංසමාලිට දීලා යන්න ආවේ . හෙට ඉස්කෝලේ එන්න"

තේමිය හංසමාලි අතේ තැබූ පාර්සලය දිග හැර බැලුවේය.

" සර් මොනවට කරදර උනාද මන්දා? මම කොහොමත් හෙට දිහාවට ටවුමට ගිහින් එන්න හිටියේ දුවට මේ කලිසම ගන්න"

හංසමාලිගේ මව පැවසුවේ පැකිලෙමිනි.

" මොන දේ උනත් මනුස්සකම්වලට මැරෙන්න දෙන්න බෑනේ අම්මේ.හංසමාලි නටන්න දක්ශයි.ඉගෙන ගන්නත් දක්ශයි.කැලේ පිපෙන මල් කැලේම පරවෙලා යන්න හොඳ නෑ "


තේමිය පිටත්වීමට සැරසෙද්දි හංසමාලි දණ නමා වැඳ ස්තූති කලේ ගෞරවපූර්වකවයි.
කෙසේ හෝ අනෙක් දරුවන් පලාත් තරඟ වලින්ම කැපී ඉවත්වුවද හංසමාලි සමස්ථ ලංකා තරඟ සඳහා තේරීපත්වුනි ඒ වනවිටත් අලුත් ගුරුවරියක් නැටුම් විශය සඳහා පාසලට විත් තිබුණි.කේතකී මෙන් නොව ඇය කාරුණික හදවතක් ඇති අයෙක් නිසාවෙන් තේමිය සහ දෙදෙනාම එක්ව පුරුදු පුහුණු කිරීම් කටයුතුවල යෙදුනෝය. සමස්ථ ලංකා තරඟාවලියේ දක්ශ ලෙස තරඟ වැදි හංසමාලි ප්‍රථම ස්ථානය දිනාගත්තේ පාසලේ නම අනෙක් පාසල් අතර ඔසවා තබමිනි.

දිනක් හංසමාලි බ්‍රවුන් පේපර් එකක දැවටූ කිතුල් පැණි බෝතලයක් ගෙනත් තේමිය අතේ තැබුවේ

" සර්ට අම්මා දෙන්න කිව්වා.

යැයි පවසමිනි .

" මොකටද දුවේ මේවා"

තේමිය එය දෙස බලා හංසමාලි දෙසද බලා ඇසීය

" මම කවදාවත්ම නැටුම් තරඟ වලට ගිහින් නෑ සර් . මම කලුයි කියලා ගොඩක් යාලුවෝ විහිලුත් කරලා තියෙනවා.මන් හිතුවෙත් නෑ තරඟ වලට ගිහින් දිනන්න පුළුවන් වෙයි කියලා.මන් හිතුවේ සුදු අයට විතරයි දිනන්න පුළුවන් කියලා ."

ඇය අඬන්නට ආසන්නව සිටියේය.

" සිංහලයා කොහොමත් කලුයි දරුවෝ. අනිත් අය සුදුවට ඉඳලා ඔයා කලුවුනාට ඒක ඔයාගේ වැරද්දක් නෙවෙයි. අනික සුදුවට ඉන්න හැමෝම අභ්‍යන්තරයෙනුත් බාහිරයෙනුත් ලස්සන නෑ.ලස්සන හිතක් තියෙන මනුස්සයෙක් වෙන්න.මේ ලෝකේ තියෙන හැම පාටම තවත් පාටක් එක්ක මිශ්‍ර වුනාම පාට වෙනස් වෙනවා.ඒත් කලුපාටට වෙන පාටක් එකතු කරාම වෙනස් වෙනවා දැකලා නෑ නේද? ඒක තමයි කාල වර්ණයේ තියෙන පවර් එක.

Sawundaraja Sineka

https://www.facebook.com/share/1AF6Fa4B7x/?mibextid=wwXIfr